Ka kohë që s’shihemi dhe ndjej
si të harroj unë dalëngadalë
si vdes tek unë kujtimi yt
si vdesin flokët dhe gjithçka.
Tani kërkoj unë poshtë e lartë
një vend ku ty të të lëshoj
nje strofë a notë, a një brilant
ku të të lë, të puth, të shkoj.
Në s’të pranoftë asnjë varr
asnjë mermer, a morg kristal
mos duhet vallë prapë të të mbart
gjysëm të vdekur, gjysëm të gjallë.
Në s’gjetsha hon ku të të hedh
do gjej një fushë a një lulnajë
ku butësisht porsi polen
gjithkund, gjithkund të të shpërndaj.
Të të mashtroj ndoshta kështu
dhe të të puth të ik pa kthim
dhe nuk do dinë as ne, askush
harrim ish ky a s’ish harrim.
– Ismail Kadare, “Kristal”